«Төрлет, еңбек адамы!» республикалық ақындар айтысы

2024 жылғы 7-8 желтоқсанда Қазақстан Республикасы Мәдениет және ақпарат министрлігінің ұйымдастыруымен «AMANAT» партиясының қолдауымен Қалибек Қуанышбаев атындағы Қазақ ұлттық музыкалық драма театрында «Төрлет, еңбек адамы!» атты республикалық ақындар айтысы өтеді.

Биылғы жылдың басты додасына еліміздің әр өңірінде жыл бойы өткен айтыстардың жеңімпаздары қатысып, жылдың қорытынды айтысында Аспанбек Шұғатай, Жансая Мусина, Мейірбек Сұлтанхан, Өміржан Көпбосын, Дидар Қами, Әсем Ережеқызы бастаған 14 ақын бақ сынайды.

Қазылар алқасының төрағасы - Қазақстанның еңбек сіңірген қайраткері, «Отан» орденінің иегері Жүрсін Ерман, мүшелері - Қазақстанның еңбек сіңірген қайраткері, халықаралық «Алаш» әдеби сыйлығының иегері, ақын Ғалым Жайлыбай, Қазақстанның еңбек сіңірген қайраткері, Қазақстан Республикасы Парламенті Мәжілісінің депутаты, ақын Жанарбек Әшімжан, филология ғылымының докторы, айтыс зерттеушісі, профессор Қойлыбай Асанов, Қазақстанның еңбек сіңірген қайраткері, айтыскер ақын Бауыржан Халиолла, «Құрмет» орденінің иегері, айтыскер ақын Бекарыс Шойбеков, Мәдениет саласының үздігі, айтыскер ақын Мырзабеков Құдайберлі.

Айтысты Қазақстанның еңбек сіңірген қайраткері Аманжол Әлтай жүргізеді.

Жүзден жүйрік, мыңнан тұлпар, от ауызды, орақ тілді жеңімпаз ақынға ақшалай сыйлықпен қоса республикалық ақындар айтысының бас жүлдесі - автокөлік табысталатын болады.
Айтыс демеушісі кәсіпкер, меценат, Q4 «Тұлпар» компаниясының негізін қалаушы Талғат Сақан.