Ғажапқа толы әуен

Құрметті қазақ өнерінің сүйікті көрермендері! Қалибек Қуанышбаев атындағы Мемлекеттік академиялық қазақ музыкалық драма театрының Халық аспаптар ансамблі «Ғажапқа толы әуен» атты концертін ұсынады.

Концертте ұлттық мәдени мұрамыз жаңаша бағытта өңделген қазақ елінің дәстүрлі музыкасы, қазақ халық күйлері мен әндері, ансамбль мүшелерінің өз жүректерінен шыққан жаңа туындылары орындалады.

Ансамбльдің Көркемдік жетекшісі – «Мәдениет саласының үздігі», Халықаралық конкурстардың лауреаты Маралжан Мырзақұлова.

         Ансамбль қазақ өнерінің ұлттық мұрасын дәріптеп, отандық музыка саласында өзіндік орны бар, қалың көрермен тарапынан зор сұранысқа ие үздік шығармашылық ұжым болып келеді.

Ансамбль қазақ ұлттық аспаптары Домбыра, Сыбызғы, Дауылпаз, Шаңқобыз, Шіңкілдек, Саз сырнай, Жетіген, Қыл қобыз, т.б. музыкалық аспаптарды жетік меңгерген әмбебап орындаушылардан құрылған.

Халық аспаптар ансамблінің репертуары көнеден қалған қазақ күйлеріне және заманауи авторлардың шығармаларына бай.

Ансамбльдің ерекшелігі әрбір орындаушы бір аспапта ойнап қана шектелмей, бірнеше аспапты да жетік меңгерген.

Ансамбль мүшелері: Жиеналин Дастан, Хамзин Данияр, Қайырбек Әлібек, Сахы Нұрболат (домбыра), Абенова Аида, Темірханова Аяжан, Хуан Ажар, Жақыпбай Мәнсия (прима қобыз), Нұрлан Әлемгүл (Қыл қобыз), Санабаева Аружан, Бағдат Алтынай (Шертер), Имашева Ақбота (Флейта, Саз сырнай), Самиғолла Бекзада (Жетіген, қобыз), Ануар Ақылбек (Бас, Баян), Абай Мадиар (Баян), Шөкенов Темірлан (домбыра, дауылпаз), Рахмет Қуаныш (ұрмалы аспаптар).

Концертте алғаш рет Темірлан Шөкеновтың «Нұр Ақжелең», Сахы Нұрболаттың «Асыл мұра» және қазақ халық аспаптар ансамбліне арнап өңделген шетел және заманауи шығармалар орындалады.