FORTE TRIO: «Камералық музыканың жауһарлары»

15 желтоқсан күні Е. Рахмадиев атындағы Мемлекеттік академиялық филармония «Камералық музыканың жауһарлары» атты концертін ұсынады. Концерт филармонияның Камералық залында (Абая даңғылы, 29) өтеді. Кеште Қазақстанның танымал камералық-аспаптық ансамблі «FORTE TRIO» өнер көрсетеді. Концерт сағат 17:00-де басталады.

Ансамбль Антон Аренский мен Сергей Рахманиновтың фортепианолық триоларын орындайды. Бұл екі композиторды ортақ ел, бір дәуір және Мәскеу консерваториясы байланыстырады – Рахманинов студент болса, Аренский ұстаз болған. Екеуі де пианист, дирижер әрі композитор ретінде танымал. Олардың шығармашылығы терең лирика мен бай әуезділігімен ерекшеленіп, әлемнің миллиондаған тыңдарманының жүрегін жаулады.

Сергей Рахманинов. Элегиялық трио №1 соль минор

Бұл шығарма композитордың студенттік шағында жазылған. Өзінің жасына қарамастан, бұл туынды Рахманиновтың кейінгі шығармаларынан кем түспейді. Алғаш рет 1892 жылдың қаңтарында орындалып, фортепиано партиясын Рахманиновтың өзі ойнаған. Ұзақ уақыт ұмыт қалған бұл туынды 1930 жылы Михаил Слоновтың мұрағатынан табылып, 1947 жылы алғаш рет басылып шықты. Бүгінде Элегиялық трио концерттік репертуардың айрықша бөлігіне айналған.

Антон Аренский. Фортепианолық трио №1 ре минор, ор. 32

Бұл туынды 1894 жылы Петербург консерваториясының директоры, танымал виолончелист Карл Давыдовқа арналып жазылған. Аренский Давыдовты ерекше құрметтеген және оны өзінің шығармаларын орындаған виртуоз ретінде бағалаған. Шығарманың әр бөлімі терең сезіммен астасып, классикалық музыкалық стильдің үздік дәстүрлерін көрсетеді. Туынды алғаш рет 1894 жылдың қыркүйегінде Мәскеуде орындалып, фортепиано партиясын композитордың өзі ойнаған. Бұл шығарма Аренскийдің көзі тірісінде үлкен танымалдыққа ие болды.

FORTE TRIO ансамблі туралы:

2013 жылы құрылған FORTE TRIO Қазақстанда ғана емес, шетелде де танымалдыққа ие. Ансамбльдің негізін қалаушы әрі көркемдік жетекшісі – Қазақстанның еңбек сіңірген қайраткері, «Құрмет» орденінің иегері, профессор Тимур Урманчеев (фортепиано). Ансамбль құрамында талантты музыканттар өнер көрсетеді: Қазақстанның Тұңғыш Президенті қоры сыйлығының лауреаты Мұрат Нәрбеков (виолончель) және халықаралық байқаулардың лауреаты Мақсат Жүсіпов (скрипка).

Концертке келіп, камералық музыканың жауһарларына куә болыңыз!