«Танакөз»

2024 жылдың 25-26 қазанында сағат 18:00-де, Әзірбайжан Мәмбетов атындағы мемлекеттік драма және комедия театрында  жазушысы, ақын және драматург Мұхтар Шахановтың «Танакөз» поэмасы негізінде сахналанған премьераның тұсаукесері болады. 

 «Танакөз» поэмасының негізгі арқауы – достық пен махаббат. Майдан даласында қан кешіп жүрген екі әкенің адал достығы олардың ұрпағына қонды. Екі ананың ақ батасы әкесіз қалған екі ұлдың әрі қарай өсіп-өркендеуіне жол ашты. Басты кейіпкерлердің өмір сүрген ортасымен соғыстан кейінгі шындығы, әкеге деген сағынышы мен анаға деген құрметі, бір-бірінен жан аямас үш достың қарым-қатынасы аясында шығармада сәтті көрініс табады.Екі дос пен Танакөздің арасындағы достық қаншама тар жол, тайғақ кешуден өтсе де, бұзылмады. Бұл – адал достар туралы дастан. Баршаға үлгі болатын жыр.  Мұхтар Шахановтың «Танакөз» поэмасы қазақ поэзиясының озық үлгісі ретінде әдебиетіміздің алтын қорына енген жауһар шығармалардың бірі. Қойылымда негізгі оқиға желісімен бірге автордың бірқатар шығармалары үндестік тапқан. Заманауи сахналық жабдықтар, әсерлі актерлік ойын, ұтымды режиссерлік шешімдер үйлесім тапқан сезімге толы жаңа қойылым баршаларыңыздың көңілдеріңізден шығады деген сенімдеміз.