Араб түні

БАӘ музыкалық мұрасының кеші

«Астанадағы араб әуені»

Ұзақтығы 1 сағат 20 минут

Жас шектеуі 10+ екендігіне назар аударуды сұраймыз

Дирекция орындаушылар мен орындалатын шығармаларды ауыстыру құқығын өзіне қалдырады

Осынау бірегей музыкалық жоба Астана қаласына Біріккен Араб Әмірліктерінің таңдаулы музыканттарын шақыруға бағытталған, олар толыққанды тахт ансамблін құрып, көрермендерді БАӘ музыкасымен таныстырады. Тахт классикалық араб музыкасын да, БАӘ-нің дәстүрлі әуендерін де орындайтын негізгі музыкалық ансамбль. Оркестр құрамында уд аспабының шебері Фейсал Аль Сааримен қоса, канун, скрипка және виолончель аспаптарында ойнайтын музыканттар, сондай-ақ қайталанбас Халиджи (Таяу Шығыс) ырғақтарын орындаушы екі соқпалы аспап музыканты бар.

Тахт ансамблі классикалық араб музыкасының элементтерімен өрілген, әмірліктердің музыкалық мұрасынан сыр шертетін қызықты бағдарламаны ұсынады. Оған әмірліктің тұңғыш уд орындаушысы Шамса Аль Джасми қатысады. Бағдарламада сондай-ақ әмірліктің тұңғыш пианисті әрі композиторы Эман Аль Хашми өнер көрсетіп, өзінің бірқатар соңғы туындыларын орындайды. Кеш қазақстандық музыканттардың орындауындағы классикалық музыка бағдарламасымен аяқталып, әмірлік музыкасының панорамасымен қатар, нағыз мәдениеттер арасындағы музыкалық диалог болмақ.

БАӘ мен Қазақстан араб әлемі, Еуропа мен Азия және тіпті Африка әуендерін біріктіретін сан алуан мәдени ықпалдар тоғысындағы елдер. Бұл концерт осы бірегей географиялық, зияткерлік және көркем ахуалға құрмет көрсетуді мақсат тұтады.

Бағдарлама:

БАӘ гимні

В.Моцарт. №40 симфония орындайтын ансамбль

«Sound of Silence» Эман Аль Хашми және ансамбль

Айяла вариациялары орындайтын Шамса Аль Джасми және ансамбль

«Hay bil Shahamah» орындайтын Шамса Аль Джасми және ансамбль

Али Бин Рога вариациялары орындайтын Фейсал Аль Саари және ансамбль

«Dar Zayed» орындайтын Шамса Аль Джасми және ансамбль

Джабер Джасем вариациялары орындайтын Фейсал Аль Саари және ансамбль

Умм Кульсум. «Alf Leila wa Leila» орындайтын Шамса Аль Джасми және ансамбль

Умм Кульсум вариациялары орындайтын Шамса Аль Джасми және ансамбль

Файруз вариациялары орындайтын Шамса Аль Джасми және ансамбль

Уд аспабында соло орындайтын Фейсал Аль Саари

Орындаушылар:

Фейсал Аль Саари (уд)

Д-р Эман Аль Хашми (композитор және пианист)

Шамса Аль Джасми (уд)

Халид бин Хадим (канун)

Хусейн Аль Хаммади (соқпалы аспап)

Али Дриди (скрипка және кларнет)

Лотфи Суа (соқпалы аспап)

Орындаушылардың өмірбаяны:

Фейсал Аль Саари (уд)

Фейсал Аль Саари БАӘ-нің Абу-Даби қаласынан шыққан танымал әртіс. Ол уд аспабында ойнауды және вокалды меңгеріп, музыка саласынан магистр дәрежесін алған. Сонымен қатар шығыс және батыс сольфеджиосын, опералық ән айту өнерін оқып, қазіргі таңда музыкалық және вокалдық ғылымдарды зерттеуді жалғастыруда. 1992 жылы өзінің алғашқы музыкалық туындысын жазған.

Аль Саари Bait al Oud музыкалық мектебіне қосылып, уд аспабының солисі ретінде курсты тамамдады, содан кейін осы аспапта ойнауды оқыта бастады. Ол уд аспабында ойнау саласын тереңдетіп, шығарма жазумен және ғылыми зерттеулермен айналысты. Бірнеше ғылыми зерттеу жұмыстарын дайындап, музыканың ережелері мен ғылым бойынша сертификат, сондай-ақ шығыс және батыс музыкасының теориясы бойынша сертификат алды.

Фейсал Аль Саари көптеген аймақтық және халықаралық фестивальдер мен концерттерге қатысты. Ол «Шығыс ертегісі» және «Әмірлік анасы» («Ел тарихы») оперетталарын жазып, «Mazeej» және «Oud in UAE» музыкалық альбомдарын шығарды, сондай-ақ әмірлік Яса хоры мен оркестрінің негізін қалады. Аль Саари музыкалық сарапшы ретінде түрлі фестивальдерде БАӘ-ні таныстырды және «Шекарасыз білім» опереттасы үшін марапатталды. Ол «Welcome» композициясы үшін Жоғары технологиялар колледждерінен марапатқа ие болды. 2009 жылы ADMAF демеушілік еткен Абу-Дабидегі классикалық музыка фестивалінде «Мемлекет тарихы» опереттасы үшін «Жасампаздығы үшін» марапатына ие болып, оны Жоғары мәртебелі Шейх Нахайян бин Мубарак Аль Нахайян және Жоғары мәртебелі Хода Кануу Аль-Хамис құттықтады. Бұдан бөлек ол өзінің жеке институтын құрып, Абу-Дабидегі Bait al Oud музыкалық мектебінде сабақ беруін жалғастыруда.

Эман Аль Хашми (композитор және пианист)

Эман Аль Хашми БАӘ-нің тұңғыш әйел-композиторы. Сондай-ақ ол оркестрлік музыка мен саундтректерге маманданған әрлеуші болып табылады. Эман пианист, суретші, жазушы, ақын әрі сценарист. Сонымен қатар ол халықаралық деңгейде сертификатталған лайф-коуч және зияткерлік меншік құқықтары бойынша Дүниежүзілік зияткерлік меншік ұйымы сертификатының, сондай-ақ мемлекеттік жетілдіру моделі (GEM) бойынша аккредиттелген бағалаушы дипломының иегері. Эман адам ресурстарын басқару бойынша бакалавр дәрежесіне және коммуникациялар мен қоғаммен стратегиялық байланыс саласында магистр дәрежесіне ие болып, екі курсты да үздік бітірді. Бұдан бөлек жобаларды басқару саласында философия докторы дәрежесін алған. Эманның алты кітабы сәтті жарық көрді, оның көптеген жергілікті және халықаралық жетістіктері бар, ол БАӘ-де бұрын-соңды болмаған 50-ден астам іс-шараны ұйымдастырған.

Шамса Аль Джасми (уд)

БАӘ-де уд аспабында ойнайтын тұңғыш әйел. Шамса Аль Джасми дәстүрлі әмірлік мұрасына негізделген репертуармен ұлттық және халықаралық сахналарда өнер көрсетіп, Біріккен Араб Әмірліктерін әлемдік деңгейде танытып жүр.

Али Дриди (скрипка)

Али Дриди 2019 жылдан бері Абу-Дабидегі Bait Al Oud музыка мектебінде скрипка оқытушысы болып жұмыс істейді. Ол араб скрипкасы бойынша мамандандырылған музыка және музыкатану бакалавры дәрежесіне, сондай-ақ Бизертадағы аймақтық музыка консерваториясынан алған араб музыкасы бойынша дипломға ие. Тунис симфониялық оркестрінің және Тунис ұлттық оркестрінің құрамында жиі өнер көрсеткен. Әлемнің әр түкпірінен жиналған әртістермен бірге көптеген ұлттық және халықаралық концерттерге қатысқан. Али 2002 жылдан бері түрлі музыкалық мекемелерде скрипкада ойнауды үйретіп келеді. Ол сондай-ақ Bait Al Oud оркестрі мен ішекті аспаптар ансамблінің негізін қалаушы әрі дирижері болып табылады.

Лотфи Суа (соқпалы аспаптар)

Лотфи Суа Тунис сахнасындағы ең белсенді әрі қарқынды соқпалы аспапта ойнаушылардың бірі. Оның қызығушылықтары, әртістермен және музыканттармен бірлестігі сан түрлі музыка салаларын қамтиды: араб, шығыс, театр және кино музыкасы. Бизертада 1983 жылы дүниеге келген, Тунисте тұрады. Жан-жақты перкуссионист және композитор, Тунис жоғарғы музыка институтын «Музыка және музыкатану» мамандығы бойынша бітірген.

Антонио Майелло, Ману Дибанго, Пол Адибу, Франсуа Реже Камбюза, Даниэл Милле, Люсьен Зеррад, Ачок Патак сынды музыканттармен, сондай-ақ Халил Карадоман, Гёксель Бактагир, Йордал Токан, Иззет Кисиль, Насир Шамма, Халед Бен Яхия, Амин және Хамза М'раи, Мухаммед Али Каммун, Лотфи Бушнак, Соня М'барек, Сабер Рубаи және т.б. араб әлемі музыканттарымен бір сахнада әрі студияда бірге жұмыс істеген.

Халид бин Хадим (канун)

Халид бин Хадимнің музыкаға қызығушылығы жастайынан, пианинода ойнау дарыны байқалған кезде басталған. Ішекті аспаптарға деген қызығушылығы кейін оның удта ойнауына себеп болған, удта екі жыл ойнағаннан кейін ол скрипкаға ауысып, онымен тағы екі жыл айналысқан, ал 2018 жылдан бастап бүгінгі күнге дейін Халид канунды үйренуге ден қойған. Бин Хадим музыкалық композицияны зерделей келе, Мәдениет және жастар министрлігінде жұмыс істейтін БАӘ музыкалық ансамбліне қосылып, білім көкжиегін кеңейте түскен. Араб әлемінің, Парсы шығанағының, әсіресе, Әмірліктің танымал әртістерімен бірге көптеген халықаралық және ұлттық іс-шараларға қатысқан.

Хусейн Шаабан Аль Хаммади (соқпалы аспаптар)

Хусейн Шаабан Аль Хаммади Иорданиядағы Ярмук университетін бітіріп, соқпалы аспаптарда орындауға бейімделген музыкаға маманданған. Хусейн ұлттық және халықаралық деңгейдегі бірқатар ірі іс-шараларға қатысқан.

«Астана Опера» МОБТ-дан сатып алынған билеттер спектакльдің өткізілмеуі немесе басқа күнге ауыстырылуы кезінде ғана айырбасталуға және қайтарылуға тиіс. Өзге жағдайларда қайтару мен айырбастау жүргізілмейді.