LET IT SNOW! LET IT SNOW! LET IT SNOW!

21 желтоқсан күні Еркеғали Рахмадиев атындағы Мемлекеттік академиялық филармония қысқы мерекелерге орай классикалық вокал солистерінің концертін ұсынады. «Let It Snow! Let It Snow! Let It Snow!» концерті көрермендерді әлемнің түкпір-түкпірінен жиналған музыкалық мозаикамен және жаңа жылдық әшекейлермен жарықтандырылған қарлы ертегінің атмосферасына енуге шақырады. Филармонияның камералық залы, басталуы сағат 17.00.

Бағдарламада түрлі жанрлар мен дәуірлердің музыкасы - оперетталардан танымал ариялар, әлемдік кино жауһарларынан әндер, шетелдік және отандық эстрада туындылары шырқалады. Филармонияның талантты солистері ҚР еңбек сіңірген қайраткерлері Азамат Жылтыркөзов пен Бибігүл Жанұзақ, халықаралық және республикалық байқаулардың лауреаттары Шахризада Тыныштық, Айгерім Аманжолова, Фируза Рахметова, Нұрсәт Алмас, Алтынбек Арыстанбек, пианист Саида Калыкова, концертмейстерлер Роза Шотқалиева және Назерке Махметова қызықты әрі академиялық күрделі бағдарлама ұсынады.

Жаңа жылды және басқа да қысқы мерекелерді бүкіл әлем бойынша жаңа жылдық кештерде шырқалатын және мерекелік атмосфера тудыратын Штраустың музыкасынсыз елестету мүмкін емес! Филармония кешінде Князь Орловскийдің әйгілі тосттары мен «Летучая мышь» опереттасынан Аделидің шумақтары орындалады. Оперетта жанкүйерлері Имре Кальманның «Принцесса цирка» және Франц Легардың «Страны улыбок» үзінділерінің шебер орындалуын да бағалайды. Френк Синатра, Андреа Бочелли, Эдит Пиафты жақсы көретін болсаңыз, елордалық солистердің авторлық интерпретацияларын естисіз.

Александр Зацепиннің, Исаак Дунаевскийдің және Арно Бабаджанянның балалық шақтағы жанға жақын және сүйікті музыкасы мерекеге ерекше көңіл-күй сыйлайды.

Консуэло Веласкестің «Bésame mucho», Марио Ланцаның «Испанское болеро» және Августин Лараның «Granada» туындылары қыстың суық кешіне құштарлық сыйлайды. Борис Фоминнің «Дорогой длинною» романсы қыстың басқа да қызықтарын еске түсіреді.

Мануэль Понсенің «Estrellita» және Эрнесто Де Куртистің «Non ti scordar di me» шығармалары концерт қонақтарын сентиманталды нәзіктікке бөлейді.

Джон Филдтің «№1 Ноктюрнін» орындайтын музыка академигі, пианист Саида Қалықова көрермендерге ерекше қуаныш сыйлайды.

Концерт солистер үш тілде орындайтын шведтік ABBA тобының «Happy New Year» дәстүрлі әнімен аяқталады.

Концерт ұмытылмас әсер қалдырып, көрермендерге мерекелік көңіл-күй, жарқын музыкалық сәттер сыйлап, жүректерін қуаныш пен шаттыққа бөлейді.

Классикалық вокал бөлімінің көркемдік жетекшісі, Мәдениет саласының үздігі Роза Шотқалиева