Симфониялық музыка концерті

Симфониялық музыка концерті

Солист Александр Кутузов (фортепиано)

Иоганнес Брамс пен Сергей Рахманиновтың туындыларынан симфониялық музыка концертін солист Александр Кутузов (фортепиано) және Қазақстанның халық әртісі Абзал Мұхитдиннің жетекшілігімен «Астана Опера» театрының симфониялық оркестрі ұсынады.

Александр Кутузов танымал пианист, көптеген халықаралық байқаулардың лауреаты. Оның Astana Piano Passion (2013) халықаралық байқауындағы жарқын өнері елордалық көрерменге жақсы таныс, пианист аталмыш додада Алтын медаль иегері атанған еді. Музыканттың қоржынында Мәскеу, Санкт-Петербор, Монтрё, Киев және т.б. қалаларда өткен халықаралық байқаулардың беделді марапаттары (Гран-При және І сыйлықтар) бар.

Пианист Гамбург, Мюнхен, Вена, Милан, Венеция, Париж, сондай-ақ Ресей, Беларусь, Украина қалаларына гастрольдік сапармен барып, концерттік бағдарламамен өнерін паш етті.

Пианист «Астана Опера» сахнасында өнер көрсетуге орыс композиторы Сергей Рахманиновтың сирек орындалатын туындыларының бірі №4 фортепианолық концертін таңдаған. Александр Кутузовтың интерпретациясы тыңдармандарға осынау тамаша шығарманың мәнін жаңа қырынан ашады деген үміттеміз.

Симфониялық оркестрдің орындауында композитор шығармашылығының шыңы, басты ұстанымының көрінісі романтизм мен классицизм дәстүрлерінің үйлесімі болып табылатын И.Брамстың соңғы симфониясы шырқалады. Танымал музыкатанушы әрі музыка сыншысы Иван Иванович Соллертинский бұл туындыға «элегиядан трагедияға» қарай даму деген анықтама берді. Барокко музыкасымен байланысты бастапқы екі бөлігі сияқты бірегей полифониялық финалы Брамс шығармасын XIX ғасырдың қорытындысы қылып қана қоймай, алдағы екі ғасырға салынған көпір іспетті етті.

Неміс романтигі шығармасының интерпретациясын көпшілік қауым танымал опера және симфониялық дирижер Абзал Мұхитдиннің жетекшілігімен театрдың симфониялық оркестрінің орындауында тыңдайды.

Концерт шымылдығын қазақстандық композитор Арман Жайымның балет музыкасы ашады.

БАҒДАРЛАМА:

А.Жайым. «Алпамыс» балетінен Тайшық ханның биі

И.Брамс. №4 симфония, ми минор, оp. 98

1. Allegro non troppo

2. Andante moderato

3. Allegro giocoso - Poco meno presto - Tempo I

4. Allegro energico e passionato - Più Allegro

С.Рахманинов. Фортепиано мен оркестрге арналған № 4 концерт, соль минор, op.40

1. Allegro vivace

2. Largo

3. Allegro vivace

Солист Александр КУТУЗОВ (фортепиано)

«Астана Опера» симфониялық оркестрі

Дирижер Абзал МҰХИТДИН, Қазақстанның халық әртісі